2026416人看過

推介 1個推介

我的箍牙分享 第一回^^

距離我第一次既箍牙生涯已經差不多十年喇!個時只係中一小朋友,我個時既牙基本上係同而家完全唔同,因為我有兩隻爆牙,而且下排既牙重疊哂,所以個時都脫左四隻犬齒先夠位,我仲記得四隻牙腳都好長!當然十年前箍既都係成排鋼牙啦,我好記得我係基本上比人笑足兩年半,因為呢排鋼牙的確係十萬個唔討好,以前唔識諗淨係想快啲快啲拆左個箍,到拆左之後,我記得我係完全無戴過固定器,所以應該差不多一年都無,就已經有啲牙移位,特別係下排牙,中間個四隻係完全移哂位,不過當然都比以前好好多!呢幾年出左黎做野之後就發覺其實身邊好多箍過牙既朋友都會好似我咁移哂位,不過我之前係完全無諗過再箍第二次,但見到好多model 朋友既牙都越黎越靚,搞到我成日就心思思好想啲牙再好睇啲,所以我就決定再箍牙喇,不過今次就係箍Invisalign,姐係隱形牙箍,最重點係完全唔會有人發覺,唔會阻住我既日常工作!

過左咁多年,而家我牙齒既問題主要都係上排有少少哨,同下排牙中間個四隻移左位,不過唔認真望好多人都睇唔到,反而就話我係有啲哨牙,所以笑得好好睇...

不過我自己就唔係好鐘意,其實都幾介意比人咁話,令到我決心一定要再箍,上排牙再箍入啲,咁樣面型我都希望會再好睇啲!

經朋友介紹之後,就帶左我去旺角揾陳醫生喇,第一次見完佢話我既問題其實唔係好大,因為以前都巳經剝過牙所以今次都唔需要再剝牙,保守估計2年就會搞掂,然後再同我解釋下成個過程!

係印完牙模同照X-Ray後,將牙模送去美國,等一個月左右就會去到clincheck呢一part

而我自己覺得Invisalign 最正既好處就係成個過程都會透過特別既電腦程式clincheck去做模擬, 會根據返你自己個人要求,每個人唔同既牙型去做返一個最好睇既效果,姐係話我未開始箍之前,已經可以睇到哂成個模擬情況,可以睇到哂啲牙係點樣移返去一個岩既位,其實真係好神奇,望住成個video真係勁期待啲牙快啲變靚左既樣!咁如果滿意個clincheck 圖,牙醫就會根據返呢個模擬去整牙箍架喇,但我自己係完美主義者,所以clincheck都改左2次我先滿意呀!

話咁快,我上個星期已經開始左戴第一個透明牙箍啦!上牙箍前,首先會洗牙然後就會開始戴牙箍,陳醫生話比我聽每日要起碼戴上22小時,個2個鐘就係可以除低刷牙食飯!

初初第一日戴既感覺就不太大,只係有少少痺左,不過對食野完全無問題,因為除低左牙箍都可以照常飲食,我自己覺得到左第二第三日係最痺,感覺到上排門牙同下排門牙係超級痺,朋友都教我可以食雪糕同飲凍水用來解痺,係有比較感覺舒服左啲既,到左第四日已經感覺習慣了,沒有再痺既感覺,每次食飯之後都習慣左要刷一刷牙先戴返牙箍!大家要一直留意呀,我都想好好記錄一下我今次箍牙既過程,三星期後我就會戴第二套牙箍,同時都要加上幾粒supportive 粒粒來加強進度,我會繼續報告!

留言