Bobbi Brown 全新 無重輕霧粉底液｜重新定義粉底液的質感｜iTRIAL用家分享
最近天氣酷熱，就算只係企係度，都出汗出到脫水（笑）。唔只成身痴笠笠，臉部大量出油出汗更令人沮喪。咁熱嘅天氣，化妝當然要轉返用一啲輕透自然、持久無負擔嘅粉底液啦！最近底妝專家Bobbi Brown隆重推出全新「無重輕霧粉底液」，重新定義霧面啞光粉底！質感猶如空氣一樣，透薄遮瑕無負擔，輕鬆還原自然真實肌膚。Bobbi Brown出名粉底出色，今次配合埋維他命營養底霜打底，可以提升肌膚保濕度、令肌膚變得更平滑細緻、仲有效維持清爽舒適嘅完美妝效。唔知今次又會帶到咩驚喜俾我呢？呢家一齊同大家黎實測啦！
Text & Photo: 肥桃 (IG：suen_momo)
實測 Bobbi Brown 無重輕霧粉底液 Weightless Skin Foundation
Bobbi Brown 無重輕霧粉底液 Weightless Skin Foundation
價錢：$510 / 30ml
產品介紹：
底妝專家Bobbi Brown隆重推出全新嘅「無重輕霧粉底液」主打有三大特點，打破市面上粉底液嘅常規，唔再需要carry厚重嘅底妝，只需要薄薄一層就可以打造精緻輕霧妝容。第一大特點，主打24小時長效持妝，採用獨特嘅高速冷凍技術，令粉底液保持猶如空氣一般嘅無重質感同極佳親膚性，達至輕盈透氣嘅膚感，即使疊加修飾瑕疵，底妝都唔會感到厚重或有面具感；第二大特點，主打24小時輕盈保濕，「無重輕霧粉底液」入面含有三重保濕複合物：透明質酸、甘油同蜂蜜萃取物，短期有助即時提高肌膚嘅水分含量，長期可以長時間保持水潤保濕；第三大特點，主打12小時長控油光，採用獨家高效平衡科技，維持肌膚長效水油平衡 。
產品實測部分
質感：5分
我皮膚偏黑，揀咗Warm Ivory色號，流動性唔會太水，垂直放都唔會滴曬落地。但出奇地質感好輕盈，用手指推開之後延展性好強。
妝效：4.5分
上妝之後有輕霧裸妝嘅妝效，好自然嘅妝感，唔會好似戴左面具咁。
遮瑕度：3分
遮瑕度中等，需要疊加一至兩層去修飾眼底瑕疵，雀斑、暗瘡印可能需要再上遮瑕膏去覆蓋
透氣度：4.5分
頂住頭頂個大太陽出左街成10個鐘，講真出汗出油塊面都唔會覺得特別焗，唔會覺得有負擔。
持久度：3分
炎炎夏日出完街，塊面都出咗唔少油。中間冇補過妝，都唔會溶得太誇張，仍然保持到自然妝感。
Bobbi Brown 維他命營養底霜 Vitamin Enriched Face Base
Bobbi Brown 維他命營養底霜 Vitamin Enriched Face Base
價錢：$610 / 50ml
產品介紹：
Bobbi Brown 除左粉底同卸妝油，打底霜都係其中一款王牌產品。今次試用嘅維他命營養底霜可以為肌膚提供清爽、滋潤嘅底妝基礎，一個簡單步驟，就可以打造出最理想嘅妝前肌膚狀態，擁有完美底妝。維他命營養底霜主打無縫貼合肌膚，提高後續粉底嘅附著力、完美度同持久力。另外可以均勻膚色、令肌膚變得平滑飽滿。最重要係提升肌膚保濕度、令肌膚變得更平滑細緻，有效維持清爽舒適嘅完美妝效。
總評
總括嚟講，Bobbi Brown「無重輕霧粉底液」好適合夏天使用。質感好透薄，唔會好焗好悶，妝感自然，唔會好厚重。但遮瑕力一般。持久度中等，戶外大概4個鐘左右，中間如果印一印油，補一補粉其實一整日出街都冇問題。上妝嘅時候我會擠一泵，然後用手指先初步係面上印開，再用粉撲仔細印開。最後用碎粉定妝。配合埋維他命營養底霜其實妝效會更貼服，佢嘅質地有少少似雪葩嘅霜狀。上面有明題保濕感，可以幫底妝保持水潤。兩款底妝產品：Bobbi Brown「無重輕霧粉底液」、「維他命營養底霜」都推薦大家夏天使用。
4.5
