【Chanel 唇釉】一推出就斷貨嘅Chanel極致鏡面水光唇釉 Rouge Allure Laque 滋潤持久帶緞面光澤

Chanel係今年9月初推出一款全新唇部產品——極致鏡面水光唇釉Rouge Allure Laque，共16色！今次唇釉主打長效鏡面亮澤、不脫色防水配方，持久度達到12小時！幾個月前我已經係網上睇到關於呢個新唇釉嘅資料，望穿秋水，終於等到香港出！一推出嘅時候我已經入手咗3隻色（#63/#72/#75），加上今次收到嘅試用，下面總共會同大家試5隻色！用咗一段時間，感覺好好！以下一齊測試下Chanel Rouge Allure Laque嘅易塗度、上色度、像真度、滋潤度、持久度同易卸度！

Text & Photo：Tiffany Tsoi (IG: your.beautyteller) | Editor：AnGel S.

Chanel 極致鏡面水光唇釉 Rouge Allure Laque

價錢：$290 (共16色)

色號：63、67、72、75、80

實測Chanel極致鏡面水光唇釉 Rouge Allure Laque

包裝： 4.5分 

今次Chanel唇釉包裝係漆黑漸變透明，會透出唇釉隻色，設計簡約高貴。唯一缺點係樽身會容易痴指模，有少少影響美觀。
 

唇掃： 4分 

唇掃係三角形形狀，採用海綿尖端，軟硬適中，搽上嘴容易控制，唇掃嘅尖端可以輕易勾畫唇形。

質地：4.5分

Chanel 極致鏡面水光唇釉質地偏水潤透薄，感覺唔會好厚，順滑易搽。啱啱上嘴時個效果係水潤光澤感，輕微有點黏笠感，但過一陣子後會慢慢形成一層膜，不會黏嘴，個效果就會變成緞面光澤。

延伸閱讀：

【Chanel 唇膏液/唇釉】極致霧面妝效 是時尚還是好乾呢？

上色度：4分 

像真度：4分 

容影上色，亦很飽和，薄搽一層已經可以蓋過我原本的唇色，疊塗後像真度會比較高。

#63 Ultimate: 蜜桃茶色，溫柔顯氣質，素顏都啱搽。

#67 Steady: 淺粉色，帶細閃，比較少女又活潑，適合淡妝搽。

#72 Iconique: 玫瑰紅色，帶細閃，輕熟女感覺，顯白，厚搽顯氣場。

#75 Fidelite: 棕紅奶茶色，啡得嚟有啲紅調，啱啱好，適合各種膚色。

#80 Timeless: 漿果紅色，秋冬色，顯氣色顯白，適合白皮多啲。

 

滋潤度：4分 

持久度：4.5分 

Chanel唇釉滋潤度中上，但會稍為比起另一個系列Rouge Coco Flash低少少。除非你嘴唇係勁乾，如果唔係唔需要特別係用之前搽潤唇膏打底（我自己都無）。同埋佢嘅滋潤度係keep到，唔會愈搽愈乾，唔顯唇紋。

持久度亦都好好！唇釉變成膜後唔會點轉印到物品上，就算有都係好輕微，食完飯抹完嘴，唇色keep到約7成。

 

易卸度：4分

唇釉容易卸，我就咁用普通卸妝就可以落到，唔需要額外用眼唇卸妝液。比較深嘅色要敷耐少少，都可以輕鬆落得乾淨。

總評：

總括嚟講，我個人好滿意Chanel呢款 極致鏡面水光唇釉 Rouge Allure Laque！各方面表現都相當唔錯，夠上色不會乾，變成膜後不會黏嘴，不會明顯掉色，「口罩友好」，好適合呢段時間用！又有有16隻色可以揀，由自然裸色到約會、具女人味嘅鮮豔色都有，可以配襯唔同妝容，適合各種場合。價錢適中，唔算好貴，推介入手！

另外，有時大家會怕搽啲sharp嘅色，驚難carry，唔夠日常。我自己有個小建議畀大家，就係唔好成嘴搽，先搽係嘴中央，再用手指/棉花棒推開邊緣，搽一個漸變唇。用呢個方法搽，例如紅色(#72)就唔會太搶眼，但又會予人一種同平時唔同嘅感覺，會容易接受啲。

延伸閱讀：

【Make Up For Ever 唇膏】仿專業唇掃設計 Rouge Artist一筆化出專業級霧光啞唇