【YSL Beauté 粉底霜】 史上最高保濕精華比例 兼具光澤感與高遮瑕嘅底妝 !？ |iTRIAL美評
YSL Beauté Touche Éclat系列一向都好受歡迎，由最初嘅明彩筆，到之後被譽為「超模粉底」嘅粉底液，我都有用！今次系列再推出新產品 — Touche Éclat Le Teint Crème 明彩透亮粉底霜，有高濃度保濕精華，聲稱可以做到有光澤又有柔焦效果嘅妝感。
今日我想同大家一齊試下呢款新粉底，試下係咪真係做到聚光柔焦，測試佢嘅遮瑕度、保濕度、持久度同氧化情況！
Text & Photo: Tiffany Tsoi (IG: @your.beautyteller) | Editor：AnGel S.
實測YSL Beauté 明彩透亮粉底霜 Touche Éclat Le Teint Crème
價錢：$550 (全7色)
色號：B20
質地：
粉底流動性唔算好強，但易推，延展性高。除左有高保濕精華，仲加入左萬壽菊同歐錦葵，有舒緩同亮肌效果，係一款護膚型粉底。所以我會建議用手指或掃上，用sponge上會比較吸粉，比較浪費。
遮瑕度: 4.5分
遮瑕度屬中上，層疊塗抹可增加遮瑕力。圖中見到素顏時瑕疵明顯，黑眼圈嚴重，有紅印和暗瘡印，而且我本身皮膚較薄，血管明顯。薄上一層已經有中度遮瑕，瑕疵遮到7-8成，同埋有修飾毛孔能力。如果本身瑕疵唔多，就咁用支粉底已經好夠。不過因為我黑眼圈好勁，所以有再上遮瑕膏係眼底。
保濕度: 5分
我係乾肌，每次上粉底前都要上保濕妝前打底霜，但我見粉底糅合86%保濕精華，係業界最高比例，所以今次上粉底前無搽任何base，想試下係咪真係好保濕同貼服。結果保濕度真係唔錯又貼面，而且上面感覺唔會好黏笠。成日落黎都唔覺得乾，留係冷氣房耐d都唔會變到好乾好緊。
持久度: 3.5分
上妝約5個鐘後開始有輕微出油，同埋鼻翼有浮粉情況，但唔嚴重，用紙巾印開就可以，出油後有d奶油肌妝感。
抗氧化度: 3.5分
有輕微氧化問題，上妝5個鐘後明顯暗左半度至一度，變得有少少黃。
色調：
色調黎講唔算多選擇，總共只有7隻色。色號前面嘅英文字母代表膚色色調，B係中間色，BR係粉色。想知自己係咩色調可以睇手腕血管嘅顏色: 綠色代表暖色系(偏黃)；藍紫色代表冷色系(偏粉)；藍綠色代表中間色。而英文字後面嘅數字就代表深淺度。不過買粉底最好都係去試清楚先好買。我自己係屬於冷色系偏白，用B10/BR10會比較合適。另外，因為粉底有氧化問題，我覺得可以揀白少少，等佢set好就會同本身膚色match返。
總評：
粉底雖然保濕度高，但佢唔係韓國水光肌/有好強光澤嘅妝感，反而係好似膚質本身就好健康透亮，出油後亦唔會顯油膩。另外，妝感真係幾無瑕，確實做到所講既以光柔焦。不過佢唔係好薄零妝感，可能因為遮瑕度好好，所以有一定厚度，用量要注意返，唔係會有面具感。同埋我覺得以呢個偏中上嘅價錢，我會對其要求高一些，而其持久度偏弱，所以扣左一些分。
3.75
