ADDICTION 遮瑕盤 | 性價比高推介! 一盒足夠遮瑕修容提亮

要保持一個持久嘅妝容，化妝每一個步驟都好重要，每次化完個底妝之後，遮瑕嘅部份對我來講係最重要，因為我有嚴重嘅黑眼圈問題和大量雀斑，所以經常花好多時間落修容嘅部份，我一直都好怕用得太多遮瑕膏或者過左一段時間，深度遮瑕嘅部份會好乾同出現裂紋，影響曬成個妝容嘅質感。今次試用ADDICTION嘅光感折射四色遮瑕盤，可以話係一試愛上，唔單止加速咗化妝嘅時間，仲令到個妝感更持久同清爽，等我即刻同大家分享吓到底好唔好用同我會唔會推薦比大家啦。

Text & Photo: WandyK (IG：wandykwong  YouTube: 雲迪wandyk)

實測 ADDICTION 光感折射四色遮瑕盤 Skin Reflect Fresh Concealer 

ADDICTION 光感折射四色遮瑕盤 Skin Reflect Fresh Concealer

價錢：$340 (全3色)

試用色號：Ivory 001

產品特色：

。包含調色和高光的四色遮瑕盤，有效調節色彩與 光影的變化 

。質地纖薄，貼合肌膚，宛若無物

。疊加塗抹與膚色相融的顏色，折射光線，自然遮蓋肌膚瑕疵

。最後塗抹高光，增加光澤感，只需這一件單品，即可打造清新無瑕妝容

遮瑕盤主要有四個顏色，如圖所見， A色係偏橙調嘅顏色，主要可以提亮黑眼圈、暗沉及其他肌膚問題明顯的地方。B色係高光，蘊含細膩的珍珠成分，有助增強妝容嘅光澤和立體感。C、D色係遮瑕式，深淺度有少少不同，可以單獨使用或混合使用，有助遮蓋其他瑕疵。

質地：3.8分 

我本身遮黑眼圈會用液體質地嘅遮瑕液，因為怕用膏狀太乾，驚過左一段時間會令眼紋好明顯，但這盒遮瑕盤嘅膏狀相對比較滋潤，上眼感覺輕薄和順滑，亦很貼服，而且逐層逐層印上眼袋唔會越上越厚。

首先我使用A色，用遮瑕掃印上黑眼圈暗沉嘅位置，印了大概兩層，顏色明顯提亮了。然後我用C色繼續印上黑眼圈位置，C色比D色偏橙一點，我印了一層再用D色中和，大概2-3層薄薄地，黑眼圈大大遮蓋了亦與膚色相近，沒有不均勻感，效果好自然。

遮瑕度：3.6分 

感覺遮瑕度不算非常高，需要輕輕上多幾層，用D色遮雀斑部份，都要大概2-3層，才遮蓋到7成瑕疵。

貼服度：4分

貼服度比較有驚喜，好難得膏狀一啲都唔乾，唔會顯紋，就算印咗幾層，遮瑕膏都好貼服，唔會變厚亦唔會加深細紋。

光澤感：3.4分 

平時提亮嘅部份我會再用粉狀嘅高光粉，今次第一次嘗試膏狀提亮，感覺還不錯，輕輕印在眼底部份，立體感和光澤感都有所提升。

持久度：3.4分 

經過一個下晝，在戶外行走出汗較多，有少少脫妝，持久度一般，但黑眼圈依然遮到4成，也不會乾到顯紋。

總評：

總括來講，我好鍾意這遮瑕盤嘅質地，雖然係膏狀但真係唔會好乾，用掃印上每一層都好薄，所以好適合新手用，以前用開遮瑕液，厚薄好難控制，有時都會用過量以致眼紋好明顯，或者令到成個妝感好厚。而且這四色各有不同，顏色好啱用，每隻色都有唔同嘅功效，只需根據自己膚色用不同顏色中和一下，就足夠不同膚色嘅修容。遮暗瘡印、雀斑同黑眼圈嘅效果都唔錯，一盒就可以搞掂曬，又方便又快捷。

真心推薦俾大家使用，我試用後覺得最好嘅方法係用遮瑕掃以輕印嘅方式上面，咁樣遮瑕膏就會更加貼服喺底妝上面，都可以持久更多。