【belif 卸妝霜】皇牌Aqua Bomb系列出新品了！低敏唔刺激炸彈潔顏霜

韓國護膚品牌belif採用草本配方，推崇低敏、唔刺激，自創立以來深得大家喜歡！我以前都有用過佢嘅皇牌產品Aqua Bomb，質地清爽，對我來講保濕力係夏天啱啱好。今次同系列推出新產品——斗篷草水分炸彈潔顏霜 Aqua bomb smart cleansing oil balm，主要成份有蓮花萃取同藥蜀葵根，成份溫和，結合「親油性」與「親水性」嘅特質，用完毋須再使用潔面產品。

今日除咗會同大家睇下呢款潔顏霜嘅質地，仲會測試下佢嘅卸妝能力同清爽度！
 

Text & Photo：Tiffany Tsoi (IG : your.beautyteller) | Editor：AnGel S.
 

belif 斗篷草水份炸彈潔顏霜 Aqua bomb smart cleansing oil balm

價錢：$290/100ml

實測belif 斗篷草水份炸彈潔顏霜 Aqua bomb smart cleansing oil balm 

質地：4分

膏狀質地，剛推開時會有少少微粒，要推多幾下先可以完全推開潔顏霜，然後質地會由膏狀變成油狀。

香味：4分 

潔顏霜無添加合成香料，聞落並無太強香味，要好近咁聞先聞到好淡嘅清新味，唔刺鼻。真係好淡好淡，唔特別留意唔會覺。

延伸閱讀：

【belif 面霜】告別暗沉膚色 強效抗氧化的炸彈霜 Aqua Bomb

卸妝能力：3.8分 

卸妝能力唔錯！睇圖會見到belif潔顏霜可以落到我手背上大部分彩妝，連一向比較難落嘅閃粉眼影都落得好乾淨，但係用嚟落防水眼線液就差少少，睇最後幅圖會見到仲差少少落唔乾淨。

清爽度：5分

清爽度好好，我係手背做咗個清爽度測試，用完潔顏霜之後按壓一張面油紙係上面，完全唔痴，面油紙無因爲接觸到潔顏霜嘅油份而變深色。
 

卸妝後皮膚清爽，沒有因爲殘留油脂而顯得油淋淋或泛油光，但對我來講保濕力唔算好強，用完過數分鐘後甚至有少少乾，所以皮膚望落欠缺光澤。

 

總評：

總括嚟講，呢款belif Aqua bomb smart cleansing oil balm卸妝能力有中上，唔太濃嘅妝可以完全卸乾淨，但如果係好防水持久嘅眼線液，或者係lip tint，就唔夠力，要卸多次先可以。膏變油嘅質地，可以快捷溶起彩妝，用落感覺溫和唔刺激，無令敏感肌嘅我過敏。過水後佢係比較清爽嘅感覺，我覺得保濕力唔太夠，如果唔立即塗上護膚品，皮膚會有緊繃嘅感覺。個人覺得乾肌係夏天用仲可以，秋冬就唔得，呢個卸妝膏可能比較適合油性肌膚使用。

延伸閱讀：

【RMK 卸妝膏】速效卸妝潔面同時按摩 卸出保濕滋潤感